𝐏𝐀𝐍𝐆𝐀𝐌𝐔𝐘𝐎 𝐊𝐀𝐘 𝐒𝐀𝐍 𝐁𝐋𝐀𝐒
𝐏𝐀𝐍𝐆𝐀𝐌𝐔𝐘𝐎 𝐊𝐀𝐘 𝐒𝐀𝐍 𝐁𝐋𝐀𝐒
Mahimayaon nga San Blas, sugod sang bata ka pa, tuman gid ang imo kalooy kon makakita ka sang mga masakiton. Daw matunaw ang imo kasingkasing kon makabati ka sang tingog sang mga masakiton kag naga-antos. Gani naninguha ka sa pagtuon sang kaalam sa pagpamulong agod makalipay kag makapaayo sang mga masakiton.
Nagapangamuyo ako sa imo nga bulngon mo ining balatian sang kalag ko. Tan-awa man sing maluloy-on ang mga pilas sang mga sala ko. Ig-ampo mo ako sa Dios nga hatagan Nya ako sing daku nga paghinulsol sang akon mga sala, kay amo ina ang bulong nga matuod sining kasakit kon pagbuot sang Dios kag sa ikaayo sang kalag ko. Malooy ka Santos nga hinigugma, bulngon mo ining ginabatyag ko sa akon liog, sa tutunlan kag sa iban nga bahin sang kalawasan kay ikaw ang gintudlo sang Dios nga amo ang dalangpan sa sini nga balatian.
O maluloy-on nga San Blas, pamatii ang mga pangabay sa imo nga kalooyan mo ang mga nagamasakit nga mga kabataan nga ginadala sa imo. Ayohon mo ang ila balatian. Subong man ang nabukog sa tutunlan imo nga kuhaon kag ang nabukog sa sala, imo nga tabangan agod maayo ang ila pagmitlang sang pangamuyo sa imo.
Kaluoyan mo man ang mga kalag sa Purgatoryo kay ikaw ang makapaumpaw sa ila, bangod kay ikaw tuman gid ka maloloy-on. Ilabi na gid karon wala na sing tupong ang imo kalooy kay yara ka na sa atubangan sang Dios, ang maluloy-on nga Manughatag. Amen.
Ig-ampo mo kami O Balaan nga San Blas
Agod takos kami makadangat
sang pinanakga ni Jesukristo.
